Axmed Siilaanyo oo caddeeyey in Xisbiga KULMIYE kalsooni ku qabo Komishanka Doorashooyinka Qaranka

Hargeysa (Somaliland.org) – Guddoomiyaha Xisbiga ugu weyn mucaaridka ee KULMIYE Mudane Axmed Maxamed Siilaanyo, ayaa shaaca ka qaaday in xisbiga KULMIYE kalsooni buuxda ku qabo Komishanka Doorashooyinka Qaranka, isla markaana taageero xisbigu la garab taagan yahay.

“Waxaan halkan ka caddaynayaa haddii aanu xisbiga KULMIYE nahay aanu kalsooni ku qabno Guddida Doorashooyinka Qaranka,” ayuu yidhi Axmed Siilaanyo.

Guddoomiyaha Xisbiga siyaasiga ah ee KULMIYE Mudane Axmed Maxamed Siilaanyo  waxa uu ugu baaqay labada Xisbi ee kale (UCID/UDUB) in ay iyaguna kalsoonida loo baahan yahay siiyaan Komishanka Doorashooyinka Qaranka, si ay doorashadu u qabsoonto.

Komishanka Doorashooyinka Qaranka ayaa shir jaraa’id oo ay shalay ku qabteen xaruntooda magaalada Hargeysa, waxay ka dalbadeen xisbiyada inay caddeeyaan inay kalsooni ku qabaan Komishanka iyo in kale, iyaga oo sheegay inay iscasilayaan haddii xisbiyadu ay caddeeyaan in aanay ku kalsoonayn.

Komishanku waxa uu ka jawaabayey eedaymo beryahan dambe lagu faafinayey saxaafadda dowladda, oo ay ka mid tahay inay ku guuldarraysteen inay xisaab-celin ka sameeyaan kharashkii ku baxay diiwaangelinta codbixiyayaasha, taas oo ay sheegeen in hay’adda Inter Peace ay maamuleysey lacagta deeqbixiyayaashu ku deeqeen, Komishankuna uu maamulayey lacagta dowladda Somaliland bixisay oo keliya.

Axmed Maxamed Saleebaan, Somaliland.org, Hargeysa.

This entry was posted in News. Bookmark the permalink.

Comments are closed.