Daahir Riyaale iyo weftigiisii oo ka soo laabtay Jabuuti, xogwarran koobanna ka bixiyey natiijada Booqashadiisa

Hargeysa (Somaliland.org) – Weftigii Somaliland ee uu hoggaaminayey Daahir Riyaale Kaahin ayaa galabta dalka dib ugu soo laabtay, kadib markii uu soo dhammaystay booqasho saddex maalmood ah oo uu ku tegey Jamhuuriyadda Jabuuti.

Mudane Riyaale oo weriyayaasha kula hadlay madaarka Hargeysa, waxa uu si kooban u sheegay in socdaalkiisu guul ku soo dhammaaday, isaga oo xaqiijiyey in ujeeddada ugu weyn ee booqashadiisu ay ahayd inuu taageero ku wajahan colaadda Erateriya uu u muujiyo dowladda Jabuuti, dibna loo soo celiyo xidhiidhkii labada dal ee go’ay sannado ka hor.

Mudane Riyaale, waxa uu yidhi, “Taasi war uma baahna baan u malaynayaa. Waxaan idiin sheegayaa inuu socdaalkayagii guul ku soo dhammaaday, walaaltinimadiina halkii hore ee ay joogi jirtey meel ka fiican aanu ku soo celiney. Dadka reer Jabuutina inaan tagno aad ugu faraxsanaayeen oo sida halkanba looga dareemaayey dadka ku dhimanaya Jabuuti xuduudkeeda Jabuutina qaar baa uga damqada, halkana qaar baa uga damqada.

Markaa horta waxaan idiin sheegayaa oo aan idiinku bushaaraynayaa inuu meel fiican ku soo noqday, dowladda Jabuutina xidhiidhkeeda … Communiqué-gii [warmurtiyeedkii] shalay soo baxayna waad ogtihiin, wixii faahfaahin ah waxaan rajeynayaa in wasiiradu mar dambe idin siin doonaan haddii alle yidhaahdo. Waxaan idiin sheegayaa inay guul ku soo dhammaatay, xidhiidhkeenana dardar cusub inaanu gelino inaan ku soo heshiiney”.

Daahir Riyaale iyo weftiga uu hoggaaminayo waxa ay socdaalkan Jabuuti oo ahaa mid lama filaan ah u ambabaxay Axaddii aynu soo dhaafnay, kadib markii muddo saddex sanadood ah uu go’naa xidhiidhka labada dal, waxana uu kulamo la yeeshay Madaxweynaha Jabuuti, Ismaaciil Cumar Geelle, iyada oo shalayna ay kulmeen Guddiyo heer wasiir ah oo labada dhinac ka tirsan, kuwaas oo soo saaray warmurtiyeed wadajir ah oo nuxurkiisu yahay cambaarayn wadajir ah oo ay u jeediyeen dowladda Erateriya oo ay ku eedeeyeen inay weerar gardarro ah ku soo qaadday Jabuuti iyo qodobo kale oo ku saabsan soo noolaynta xidhiidhkii hore ee labada dal, kaas oo inta badan ka fuli waayey dhinaca Jabuuti.

 

C/risaaq M. Dubbad, Somaliland.org, Hargeysa.  

This entry was posted in News. Bookmark the permalink.

Comments are closed.