Madaxweyne Riyaale oo berrito hortagaya labada Gole ee Baarlamanka

Hargeysa (Somaliland.org) – Madaxweynaha Somaliland, mudane Daahir Riyaale Kaahin ayaa la filayaa berrito inuu hortago labada gole ee Baarlamaanka – Guurtida iyo Wakiillada – halkaas oo uu hadal uga jeedin doono xildhibaanada labada Aqal.

Warka sheegaya in Madaxweyne Riyaale berrito hadal u jeedinayo labada gole ee Baarlamaanka oo aan si rasmi ah daboolka looga qaadin, waxa xaqiijiyey ogeysiis caawa fiidkii laga baahiyey telefishanada oo lagu wargelinayo mudanayaasha labada aqal ee Baarlamaanka inay ka soo qaybgalaan fadhi wadajir ah oo labada aqal ee Baarlamaanku berrito yeelan doonaan.

Ogeysiiskaas oo ay ku saxeexnaayeen Labada Xoghaye ee labada gole, waxa tafaasiil ah kama bixin ujeeddada fadhiga wadajirka ah ee labada gole. Hase yeeshee, warar xalay soo baxay ayaa tibaaxay in Madaxweyne Riyaale uu ku talajiro inuu hortago labada aqal ee Baarlamaanka.

Lama garanayo sababta keentay tallaabadan uu Mudane Riyaale ku hortegayo labada gole, xilligan oo dalku ku jiro xaalad murugsan oo xasaasi ah, taas oo ka dhalatay mudda-kordhintiisa golaha Guuridu go’aamiyey dhowaan iyo weliba waxa uu la gola-tegi doono.

Sidoo kale, waxa aan la ogeyn munaasibadda uu Madaxweyne Riyaale ku beegayo tallaabadan.

Dastuurka Somaliland ayaa Madaxweynaha ku waajibinaya inuu sannadkiiba hal mar khudbad sannadeed u jeediyo labada gole ee Baarlamaanka. Waxaana la filayaa in Madaxweynuhu qallaynayo khudbaddii sannadka. Dhinaca kale, Golaha Wakiillada Somaliland ayaa fadhigii sii maanta isku raacay inay sii wadaan kalfadhi aan caadi ahayn oo socon doona muddo bil ah, xaaladda dalku ku jiro wakhtigan awgeed.

Kalfadhigan aan caadiga ahayn waxa kale oo lagama maarmaan ka dhigaya miisaaniyadda dowladda ee 2008 oo aan weli golaha la horkeenin, isla markaana la filayo toddobaadka soo socda in golaha loo soo gudbiyo.

C.risaaq M. Dubbad,

Somaliland.org, Hargeysa.

This entry was posted in News and tagged , . Bookmark the permalink.

Comments are closed.